Jetzt heisst’s schnäll reagiere,
nach de ………….. sälber öbbis brobiere.
Das het sich nit nur dr Pedro in Kopf gsetzt,
dr Diego isch vo däre Idee au nit entsetzt.
E Sitzig wird schnäll duuredruggt,
ich glaub ich wird fascht veruggt,
bis mir alles besproche händ isch fascht Nacht,
so lang hänn mir die Sitzig gmacht.

Au ich bi natürlich bi däre Sach drby,
und gli isch au d’Ramona mit vo dr Party.
Juhuiii scho vier Lüt sind intressiert,
mir foge aber nomol zwei und das ungeniert.

Dr Pedro und dr German mien au drbi syy,
denn die zwei könne spiile mir lade si yy.
Vor allem dr German isch hell begeisteret,
dr Pedro luegt aber no bitz entgeisteret.

Isch egal mir legge loos,
denn mir wänn doch gli uf d’stroos.
D’Idee spruudle us uns use mir könne kum schloofe,
doch bald kunnt denn d’ Katastrofe.

Die ersti euphorie,
isch ganz schnäll wider verbii.
Uf eimol kömme so vill Frooge uf uns zue,
und ganz vill gänn uns überhaupt kei rueh.

Wo wänn mir uns bewege in zellere zoone?
Was für lüt nämme mir wo wo dien woone?
Wo wämmer denn mit de Instrumänt nur aane?
Wo iebe mir überhaupt Nundefaane?

Gli dien mir nümme uf Wolke siibe schwääbe.
Vill holt uns zrugg ins richtige lääbe.
Ich glaub mir mien alles nomol diskutiere,
bevor mir uns irgendo in dr Luft verliere.

Jetzt heissts zerscht emol schalte,
und das ganzi vo vorne verwalte.
Briefe wärde gschriibe au an d’ Daige,
ob si nit au e Plätzli für uns haige.

Zyttige und jedes Inserätli wird glääse,
Heftli und Internet Sitte wärde verlääse.
Welle Käller könnte mir nur nää?
Vellicht dört, do oder doch dää?

Es isch gopfridstutz überhaupt nit glyych,
denn mir sind gar nit ryych.
E billige muess es unbedingt syy,
es verlauft und verlauft….. ich glaub mir löhns doch lieber syy.

D’ Gedangge wärde neu orientiert.
Und jede isch wider für sich sälber intressiert.
Wenn me dänggt scho e Name hämmer gha,
El Combo, mir wüsse, no niene stoht dä dra.Alles dien mir ruhe lo und vergässe,
obschon im Hinterstüübli blibs unvergässe.
So göön zwei Johr ganz schnäll verbii,
mir dängge an die letschti aktiv Fasnacht hindedryy,
und wider kunnt e Fasnacht und mir sind no niene,
jede muess für sich sälber öbbis usbrobiere.

D’Fasnacht 2009 stoot vor dr Tüür scho bald,
und mir gseen vor lutter Bäum immer no kei Wald.
Doch plötzlich kunnt e Telifon, dr Diego isch dra,
ganz schnäll duet er schwätze, ich ha news HAHA!
Ganz gspannt loost dr Pedro ihm zue,
in dr ganze Stuube isch ei rueh.
Dr Diego verzellt er sigi go luege,
im Internet uf em Märtplatz, nei nit bi de Fuege,
nei bi de Hannedropfer do könnte mir zur untermieti si,
es isch au nit düür nur e paar hundert Fränkli miesses si.
Die beide händ sich denn scho gli druff abe,
verabredet und sind in de scheeni Käller abe.
Dr Chef dört unde het ihne alles erklärt,
das wär natürlich super und für uns vill wäärt.
Stell dir vor zmitzt in dr Stadt,
weisch wie glatt.
In dr nöchi vom Platz mit em Määrt,
ghörsch scho bald e super Konzäärt.

Mit früscher euphorie nämme mir’s wider uf,
und haue no eine druff,
mir mache Nägel mit Köpf,
und haue uf Töpf.
Mit unterschriibe bi de Haanedropfer dr verdraag,
und jetzt gohts Schlag uf Schlag.
Sitzige wärde gmacht spontan und lang,
bis am Morge am zwei mir verspüüre dr drang.
Mir merke, jetzt oder nie, mir schaffe die Hyyffe,
mir wänd gli dr Pedro si Major Pfyyffe ghöre Pfyyffe.
Statutte, Lieder, Kostüm, Larve alles kunnt uf e Tisch,
ich glaub jetzt macht niemer me dr Fisch.
Wichtigs fählt jetzt nur no eins wo isch,
doch eigentlich isch es logisch,
dr Name vo däre Gugge muess aane,
Hejo Combonischte mir hisse d Faane!
Endlich isch dr Traum in Erfüllig gange,
wenn me dänggt wie lang mir hänn miesse blange.
Inzwische sin au scho mehr lüt ko wo uns dien begeere,
und nit eifach bleed, wie anderi dien schneere.

Mir händ dr Plausch und findes glatt,
und schmegge scho dr Larvelagg.
D Fasnacht 2010 si kunnt y spiirs im ganz im Finster,
Achtung Morgestraich vorwärts Marsch heissts denn vor em Minster.

Bis denn winsch ich eych e spannends johr und fill fraid
Das alles het d Janine vo de combonischte gsaid.