Combonischte Präsi Bricht Rückblick 2022 / 2023

 

Mitteme Countdown hämmer letscht Jòòr gschlosse

Und e grosse Applaus vo eich im Häärz gnosse.

E Usbräche, e Sääligkeit, e wooligs Gfyyl het uns umschlosse,

dass mir äntlig wider dèèrfe Fasnacht mache und d‘ Frau Fasnacht nimmi verstèggt isch und verschlosse.

Äntlig, das gramsle im ganze Körper verstüüre

und d’Fraid iiber die drey scheenschte Dääg verstrüie.

Das hämmer gmacht gha und wie.

Ych bi baraad gstande am Mòòrge frie.

Zämme mit myne Kinder no in dr dùnggle stilli am Rand vo Basel

und kùùrz vor de 4re in dr Stadt mit spannig und gedämpftem gfasel.

My dochter s’èèrscht mol s‘ Piccolo am Morgestraich in dr Hand

ych d’Drummle umghänggt und mir vor fraid e Drääne tropft iiber dr Larve Rand.

Die Stimmig wider erlääbe dèèrfe macht aifach gligglig

die Stilli, d’Fraid, d’Spannig vor de 4ri aifach iidrügglig.

ACHTUNG MORGESTRAICH VORWÄRTS MARSCH!

Es schittled und tschuudered mi lägg mir am Arsch.

No nie isch mir e Morgestraich so ii gfahre wie denne.

d’Emotione und d’Gfyyl koche hoch und fange abo brènne.

Dupfeglyych isch es wytergange iiber die drey scheenschte Dääg vom lètschte Jòòr.

Ych grieg mi nimmi yy, weiss bald nimm wo aane, isch wirgglig alles wòòr?

Määntig Noomidaag, Sonne scheint, s’Goschdym sitzt.

Es funggled, glitzered wider iiberaal, es blitzt.

Bi de Mobiile Jugendaarbed im Glaibasel heissts drnoo yy stoo.

Aaber wie allewyyl hämmer z’èèrscht mol no aine gnoo.

Mir vergìtzle fascht und leege denn d’Larve aa.

Dr Pedro pfyfft, dr Schlag food aa, ….. MEGA !!!

Mir laufe richtig Kasärne aabe an Bappe Rhy

wo dr André Fötteli macht vo uns mir saage yy.

Mir schlängle uns wyter richtig Steine, denn das isch unser Ziel.

Wo mir uf unseri èèrschte Fans wäärde dräffe, denn das isch dr Deal.

Noo dr stäärggig vom Znacht im Kiechli goots dènn wyter.

Mir spiile the house, lägg deent das no schitter.

Defiir k unser nei Medley mit vyyl Applaus drùmpfe,

so mien mir nonig grad in de Cliquekäller versumpfe.

Versumpfe halt da war doch was!

Mir stèèn am Barfi es isch zwelfy in dr Nacht.

Combonischte mache Pause, hejo wie mes männgmool so macht.

Doch glyy wämmer wyters, denn es zieht e weeneli do,

speeter wird denn scho nonemol eine gno.

Dr Major pfyfft, mir stehen baraad,

Aaber aine fäält, wo isch dä jetzt dä Kaarad?

Vòòrhäär isch er grad no do gsi unsere Wäägelizieher.

Tobi wo bisch? Komm hier her!!!

 

Nyt, ewägg, verschwunde, nur d Larve ligt no do.

Allwääg versumpft und dèèrt in däre Gnille eine gno.

Rettig kunnt wie no ganz vyyl an däre Fasnacht.

Unseri vier Flauschis root, blau, veielett und grien e Bracht.

Was hätte mir nur gmacht ooni eich ir liebe vier,

fir das gits au in däm Jòòr nonemol e Bier.

Jänu macht nyt, mir mache Schluss fir hit,

so simmer dènn zrùgg ini unser Depot gfaare.

Easy au ooni Instrumänt könne mir unseri Haltig waare.

So simmer de Käller noche gloffe

Und händ halt the green frog gsoffe.

Im Deepak schmègge die bsunders guet

Und gään ihm fyr s‘singe vorallem Muet

 

PEDRO KLOPFT PAUKE EEEE BABY U A

 

Am 4ri am Mòòrge isch es denn Zyt,

denn dr Haimwääg isch jetzt e weeneli wyt.

E paar Stund d’Pflùme drùgge duet jetzt wool,

denn am Zyschtig am 1 heissts scho s’èèrscht mol zùm wool.

Zyschtig, d‘ Kinderfasnacht in sinnere Bracht,

und d’Sunne eimol mèèr vom Himmel lacht.

E Combonischtli good und git e referänz,

und macht ganz glaar jedem Waggis konkuränz.

Au dr Kornel und dr Levin dèèrfe mir s’èèrscht mol begriesse,

das isch nadyyrlig èbbis zem begiesse GLAS HEBE

Blaue Himmel, d’Sunne straald, Thämperatuur isch lau,

mir kèmme super dùùre sogar ooni Stau.

Dòòrum heissts fir alli Combos uf die finvi ii stoo

und mir hänn Kurs richtig Barfi gnoo.

Dèèrt hänn mir kocht uf em Barfiesserplatz,

Hörnli mit Haggfleisch und zem Dessert e Schnaps.

Dernoo e Bsuech bi de Lampe uf em Minschterplatz wo immer e Bracht isch,

wo dr doot kasch gsee als Kòpf oder Körper wo bsùnderbaar markant isch.

E dùnggli Sach und es tschuudered mi ganz gwaltig,

mir ziets wider abe in d’Käller dèèrt gits die besser Unterhaltig.

Doch z’èèerscht s’eint oder ander Platzkòzäärt fir s’woolbefinde, bivòòr mir de Käller noche däppele und in eim verschwinde.

Gschlosse zien mir wyter vo Käller zu Käller wie scheen das isch,

und mir sogar jedes mol Platz finde amene Tisch.

Irgendwenn wird’s au fir hitte Zyt und mir mache uns uf dr Heimwääg.

Denn morn Mittwuch gits nomol e geile daag allwääg.

So isch es denn au gsi.

Nonemol het dr Petrus alles gää

und mir hänn vill Sunneschiin kenne entgeege nää.

Unser obligats Fondue hämmer daas mol kocht in dr Steine

wo uns eine beobachted mittere Kamera so eine.

E Fotigraf wo unseri Idee dr Hit findet

uns abliechted und mit uns e Blitzwitter zindet.

D’Büüch sind fillt und e kiele Wind zieht uf,

Zyt das mir witter geen richtig Ändstraich….. ufffff.

Mir wärme uns nonemol uf bim Stadtkäller unde

Denn heissts parat mache fir dr Ändstracih wo mir unterem Toor stòòn em runde.

Mir gänn nonemol alles mit Häärzbluet, Seel und Fun

Bis zum letschte lied, the rising sun.

Mir blibt dr Speiz wäg, d’ Emotione koche iiber,

dr letscht doon und e huffe drääne laufe iiber mini Bagge driiber.

Wow, mir fääle d’Wort, ych ka mi fascht nimmi erhole

was fir e Fasnacht 2022 es duet mir woole.

Fir mi die beschti sits Combonischte git

alles Top gsi vo A-Z weiss nit was saage eifach mi Favorit.

Dr krönend Abschuss dr Bummel wo mir d’Pinsel schwinge und unseri kreativität zem usdrugg bringe.

Im Atelier vo Pain it easy

Ka also jede easy drbi syy.

E grandioses Buffet vom Charman und sinnere Frau

Do kunnt mir nur ei Wort in Sinn…. Wow.

D’Freie aabe laufe es isch programm wie immer

und uns kenne presentiere lueged so simmer.

Dr letscht Schlag dr letschti doon denn isch s’ verbyy

Es isch e wunderscheeni Fasnacht gsi.

GLAS HEBE

 

Mir mache e Pause und kräft dien mir sammle

Aber nyt fir alli heissts ufem Kaanebee ume gammle.

Dr Pedro dryybts in Allschwierwald denn in sim Kòpf spruudlets scho häftig.

Neii Lieder mien aane, d’ Idee sind do und wie däftig.

Dehei isch es z’lut und d’Noochbere närvts langsam

Fir d Bliemli und d’Strüücher duss isch es balsam.

Scho glyy stöön die zwai neiie Lieder plus e Medley

Es isch eins vo dr Legände, es isch vom Bob Marley.

Scho gli isch denn au dr Summer doo.

Und bim obligate GV Grill hänn mir wider eine gnoo.

Dr Summer isch au bald verbii

und mir stimme uns wider ii.

S’Probeweekend im Septämber im Skilla

Fir uns Combos so z’saage e Villa.

Iiebe dien mir sigs drompeete oder posuune

Sousi, bässli es verdeèèrbt uns nit d’Luune.

Au dr Schlag isch am schaffe und es styygt d Euphorie

Denn dr Levin lèèrt bi null, nämlig d’Theorie.

E Pause mitteme Blättli mit Käs, Spägg und Ei

Das git uns kraft und saft bis am Mòòrge am zwai.

 

Will au in däm Jòòr het unseri Kitchen Party nyt dèèrfe fääle

und wenn mir kennte wurde mir die fir jedes Wucheend wääle.

Charman are you sleeping? Frogt dr Pedro im Bett

Dr Charman, I’m thinking, no not yet.

And now? Goot d’Froogestellig witter

Shut up, fuck off, git dr Charman als Antwort schitter.

E weeneli spèèter, e Frog an CharmEn.

Are you sleeping men?

No, shut up now really

You are so stupit an silly.

Wäärend anderi brobiere z’schloofe

durne die andere umme wie glaini goofe.

Gli kèèrt doch e stilli in die Villa

und es wird müüsli still im Skilla.

Am Mòòrge, nit mol gross verkateret nacheme feine z’Mòòrge,

sind alli bräschteli verfloge und au d’Soorge.

Jetzt wämmer loose was no bliibe isch nach so vill wysse.

Schlag zeiget emol was ir kennet aber nit bschisse.

Dr schlag stoot aane, logger kenne mir das mache

me zellt ii…. scheisse wie goots…. Alli fange afo lache.

Isch iiberhaupt no èèbis hange bliibe vo geschter?

D’ Blööser verdätschts fascht und es goot loos das gleschter.

Mir lööns lieber syy, es isch doch spoot worde letscht Nacht.

Zum Gligg weiss dr Kornel no wie me zellt siebe, acht.

So isch au das weekend sim Ändi zue gange.

Zem Gligg mien mir gar nit so lang uf s’näggschti blange.

Nach dr Wiehnachtspause goots scho bald wider los

Und mir wisse au im 2023 wird’s famos.

Am 21. Januar s’näggscht Weekend bereits

nei das Skilla verliert nie si Reiz.

So simmer mit Sagg und pagg wider gfaare,

nei nei mir halte eich wirgglig nit zem Narre.

Es isch jo e kùùrze wääg ins Skilla, praggtisch e Hupf

Dorum bim aa koo, es isch bruch, gits zèèrscht mol e Schnupf.

Denn from the beginningen to the end

It is immer e great weekend.

Vorallem if we are immer on swiss time

then the Indian time ka gar nit shine.

And if we hänn dr Kaländer in the head

Charman is nit asking aaa isch it today instead?

Mir bim spiile not dancing on the tisch

aaber au nit stingge like a fish.

Otherwise du know wos gschlaage het and the Storry

Dr Pedro sait ganz fast….. say sorry.

And if you are not listening gits uf e sagg

because you are to deep pak.

 

 

Los es isch wies isch mach Fasnacht hänn si gsait

Und nit vergässe, au das isch bruuch legg Zoggeli aa hänn si gsait.

Lèèr e Instrumänt wie posuune du gritte

Aber gäll Alejandra nit vergässe d’Zään uf d’Sitte.

D’Arschbagge zämme klemme au z’Nacht im dùnggel

Sunscht waggst am änd us em A… nus e Forunkel.

Gälled dir versteen nur Bahnhof es sinn Insider,

do kenne nur the real Combos mitrede laider.

Us dämm Grund due ych jetzt do schliesse

Und dien d’Fasnacht 2023 somit begriesse.

Ych winsch allne Combonischte, Passive, Gönner, Fründe, Verwandte, Bekannte und Gliebte e grandiose Mòrgestraich und e scheeni Fasnacht

Und schliess drmit mit 1,2,3,4,5,6, siibe, acht.