Fasnachtsbangg 2025

Die scheenschte drey dääg sinds gsi im 2024, sisch wahrhaftig woor,
Denn schönner isch es nit worde in punkto Wätter, vom räscht vom Joor.
D’ Fasnacht 2024 het gstrahlt in Farbe, glitzer, glämmer und gold
Und unsere neue Waage hets tatsächlig gschafft und isch durch d Fasnachtsgasse grollt.
Elektrisch, Schiebedür, Brämsi, Liecht fascht wie e Tesla, er fahrt fascht vommene elei.
Nei nei dr Tesla, er isch uf em Parkplatz, ganz brav elei dehei.
Unsere Combowaage läng miir s’Gwehr,
Alles isch also ohni gewähr.

Vellicht isch es e Omen gsi, dass dir händ dörfe druff signiere
Und mir dorum so toll händ könne brilliere.
An forderschter Front mit de goldige Gsichter und strahlendem lache
Bringsch in jedem vom Strooserand si Fasnachtsfüür zum entfache.
Mit Lüchtstääb marschiere miir in d’Freiestroos in richtig Luftschloss,
Schnäll hämmer aber gemerkt, dört simmer nit dr Boss.
Druurig aber woor isch es allewyyl no so, 
dass Guggemusige nid sin willkomme do.
Dorum zien mir schnäll witter richtig Münschter
Denn deert simmer glar erwünschter.
E geils Platzkonzärt hämmer dört dörfe erläbe
Und für e kurze Momänt sogar uf dr Wolke 7 schwäbe.
Dangge an alli die wo uns durch die drey scheenschte Dääg dien supporte
Mit eurem Applaus, Jubel und dr geile Stimmig im Härz
Do vergoht uns jede no so gleine dumpfe Schmärz.
Unseri Freud lömmer uns aber nit lo näh
Mit zwei neue Member könne miir umso mehr, alles gäh.
Welcome Tatjana als unseri Vortrabs Queen,
Miir verleiie dir unser heilige Combo-Schiin.
Klein aber fein wie dir wüsset isch unser Motto
Und mit unserem jünschte am Schlag isch Fasnacht mache, wie e 6er im Lotto
Au e härzliggs willkomme ganz offiziell an Lián
Waikenjason geilomat and just have a lot of fun.

Now listen emol, Gopfridstutz and give me the gun
We are waiting here for you in the sun
Where are you, holy Cow, we are waiting for you now !
Well, where are you? I'm here like always on time?
Ahhhh Oh neinnnnn………
Da war noch was, where is the Routeplan, I forgot
I guess, I’m wrong where I should meet you sott.
You go me on the Alarmclock, I make you legs,
And by the way; Who the fuck is Alex!
Jo hösch die Näme I kas nit glaube,
Die dien mir dr letschti Närv no raube.
Charman scho 7 Joor bisch bi uns derbyy, mir sind phärbläx,
Jetzt weisch immer nonig, who is Alex?
Isch’s jetzt dä vom Vortrab oder die an dr Posaune


Egal, wäge däm verdärbe miir uns nit d’ Luune.
Nach allne Wuetusbrüch, lutte Stimme und roote Gesichter
Kunnt zum Zug mit klarer Stimm unsere “Stroofrichter”.
Dä übernimmt jetzt wider s’Zepter das het sich bewährt
So nämme mir aa lauf zur Heuwoog für’s Platzkonzärt.
Um däre Stimmig no e züggerli z’gäh, warte uf uns jetzt gfüllti Täller, 
Härdöpfelstogg, Fleischvogel garniert mit Schnitzelbägg
Das alles im Barbara -Käller.
Gärn wäre mir no länger hogge bliibe, doch d’ Fasnacht het uns witter triibe. 

Witter goht’s, mir händ e Plan zum verfolge
Nit das miir si nomol verpasse unseri Fan’s die holde.
Drum stöön miir pünktligg parat uf dr Matte
Jetzt gämmer alles und pagge kei einzige me in Watte.
Bisch parat und bisch gsattlet in däre Gass
Es isch lut, es hallt, es dönt voll krass und fascht e glai gemein 
Aber nit für uns d’ Combonischte, sonder für d’ Ramstein.
Mir freue uns scho uf morn bim gliche Platz, 
Denn au morn hämmere mir do ein uuse, nämmlig unseri Combo Katz.

Scho isch dr letschti dag jetzt aa broche,
Doch, doch miir gspüres scho langsam in de gnoche.
Doch jetzt gämmer nomol alles, mir dien duur d’Gasse fääge,
Bis er denn kunnt zum Ändstraich, dr aa gseiti Rääge.
Es isch scho gli 7bni zoobe es isch zyt zum ässe,
neume anders ahne als bim Santos Encantos, kasch grad vergässe.
In s’Küchlin gömmer scho sit villne joor es isch dr Hit
Do wirdsch härzligg empfange und verschmützlet, wow shit.

Denn, bim Spiegelhoofdurchgang richte miir uns ii

D’Flauschis unseri treue Begleiter sind au do wider derbyy.
Mir mache’s uns gmietligg und baue uns e Wohnzimmer
Mit Sofa, Tischli, Schmugg und glimmer, denn so simmer, immer.
Zwünscheduure e Ständeli mit unterstützig vo dr Latinofraktion
Bringe mir vill Lüt zum stuune und groove mit däre Aktion.
Es wird Zyt mir mache uns parat
Denn gli schloots wider 4ri, schaad.

Achtung Ändstraich! Dr Pedro pfifft e letschts mol in d’Pfiffe.
Uns schiesse d’ Drääne in d’ Auge, mir könnes nit begriffe.
D’ Fasnacht 2024 isch verbii mir umarme uns innig,
Frau Fasnacht daggschön fyyr alles, es isch gsi Irrsinnig.

Nach dr Fasnacht es goot witter im gwoonte Chaos,
Und mängmol, doch me dörfs scho sage au im Rhytmus
Uf unserem Programm stoot au no dr jubi Bummel,
Yych weiss scho jetzt das git wider e Rummel.
Scho kurz nach dr erschte Zug fahrt döönt im Pedro sini Stimm mit hochem Ton,
Coño, Puta, Bendito sea el señor nei nundefaane, wo isch au mit Telifon?
Mmmh ligge lo hesch es du Lumpe diddi du
Dr Zug isch ab, ferme la port, d Tüür isch zu.
Zug fahre, hi und här, umstiege uf Zug und Poschti es macht eim mieh,
Doch am Schluss hämmer freud und es isch sau glatt bim Trauffer und sine Kieh.

Zobe nach däm uns s Hotel dr Riegel gschoobe het
Göön mir no lang nonig in’s Bett.
Ab goots über d’Stroos in Innertkirche in d’ Ritzli Bar
D’Nacht isch schön und kalt richtig Stärne glar.
In däre Bar dem alte Ritzli
Sin alli häppy und aderi au spitzli,
Denn au d’ Spitzli vo de Bärge hän öbbis iiberko und wiss gmacht,
Nämmlig e flüümli Schnee in däre September Nacht.

Nit nur mit Combomusig ghöre und fühle mir dr Sooooul
Nei, au fascht alli gspühre dr Rythmus sogar dr Stefan unser Asshouuul…
Ou tschuldigung, genau das hani jo nit welle sage
Doch mit z’vill Alkohol dure Daag, kunnts für gwüssi zum draage,
Dass me statt Nashorn, Asshole duet sage.
Es kunnt drzue dass, halt gwüssi nit dur 1fach, sodern 2fach mien dängge
Und dorum s’ Hirni mit dr Sproch oft inne anderi Richtig duet längge.
We know Charman you try to improve swiss German very well
But be careful what you say, passiert ischs very schnell und de kriegsch eins uf d Nüss
And then you need to run away and say. Ok tschöösss. 

Und jetzt mache mir e Gummp ins Skylla,
Unseri alt bekannti tolli Villa.
Skylla alle Jahre wieder im November (englisch)
Und wenn du willsch kasch si, e Member !
Für zwei isch es scho e daag friener los gange, 
Denn si hän kuum könne uf die Villa blange.
Nei, dr woori Grund worum miir zwei scho am Fritig uffe sind Gott sei Dangg
Will mir e Flow gha händ im Kopf, zum brinzle vo däm Schnitzelbangg.
Doch nid nur dä Schnitzelbangg het drvo könne profitiere,
Denn miir zwei sind drzue no aa ständig und hänn maniere,
Wie s’ Tapfere Schniiderli 7 auf einen Streich
Hänn miir scho ii pufft, ii gfüürt, ii gruumt, ii gschänkt, ii grichtet, ii gheizt und ii glüchtet
Gället ihr liebe Combofründe, dass isch nümmi nüt und gar kei Seich.
Numme eine het kei Agenda im Kopf,
Jetzt isch er halt dr armi Tropf.
Er muess dra glaube
Das mir ihm alli dr letschti Närv dien raube
Dr Deepak het nit ii packt 
Sondern het eine uspackt.
Alli andere sind parat und es ka los go in däm Schuppe,
Zum z’Nacht gits sälbergmachti knöpfli und kei Suppe.
Au das mol hänn miir e Retterin in dr Not ka für unsere Wyy
Möge dir euch no erinnere, letscht Joor isch es unsere flauschige Mike gsi.
Unseri Wyyfee isch nit gsi d’Meerjungfrau Arielle,
Sondern unseri heissgliebti Passivi: d’ Muriel.
Dangge nomol an däre Stell uf di kamme zelle
Näggscht mol bisch denn du dra: a zelle Bölle schelle, d Katz goht uf Walliselle…..

Bi de Probe durchs Joor isch es mängmol schwär
Neui Lieder lehre, am Aafang machts Hirni läär
Dorum, händ ihr gwüsst, dass Källerabstieg au anders goht?
Und das, dass jedi Wuche in unserer Agända stoht.
Amme am Donnschtig, wo mir dien alti und neui Lieder probe

Dönts vo der Schlagfraktion ganz links hinde im Egge obe,
Momänt, wie gohts jetzt scho wider, isch dr Takt langsam oder schnäller?
Hey nei, wart kurz, ich weiss es grad, ich muess es uffe hole vom tiefe Käller.
Do drmit sin natürlig im Levin sini Gedanke gmeint,
Und er uns in de Probe immer wider als 1 vereint.

Vom Ändstraich bis zum hüttige Dag isch uf dr Wält vill passiert,
Langwiilig wirds sicher nit, das isch sicher garantiert.
Sit Mässbeginn es isch jetzt glar und es git scho bitz meiss,
Dr Glyymawandel isch witterhin uf em Vormarsch, überall isch es z’heiss.
S’ 2024 isch nämmlig so heiss gsi wie no nie,
Do hänn die Glyymaglääber bsunsers vil mieh.
Denn wägedäm vo ihne us ische ganz glar,
So Hochwasser kunnt numme wäge dämm, du Narr !

Im Tessin, im Wallis oder au im Bärneroberland kunnt über d Ufer e Bach
E riise Unwätter, wo Stroose, Brugge wäg risst au e mänge Dach.
Vill Hilfsgräft bruchts jetzt zum alles wider ufbaue und fligge
Und me Hilfsgieter in die verschüttete Dörfer duet schigge.
Es wird e Momänt go bis alles wider stoot wies sott
Alles wider si gwoonte lauf nimmt und me isch im trott.

Apropo trott, do kunnt mir grad e anders Wort in Sinn.
Es isch e Person wo hinter däm Wort duet stoo, glaub yych spinn.

So eine wo scho mol vor acht Joor für furore gsorgt het
Und in sinnere Amtszyt e huffe abgriegt het, nämmlig fett.
S’ Wort muess me ableite e bitz, vo trott zu Trottel.
D’Reed isch vo däm in USA, em Trump däm Goggel.
Jä nu es isch wies isch me kas nümm ändere jetzt,
Zum Gligg in 4 Joor wird dä trottel wider ersetzt.

Zur Freud händ mirr aber au no erfreuligi Events dörfe gniesse
Miir händ nur ganz fescht dr duume drugge miesse.
Ganz Europa het gespannt in d’ Glozzi gluegt bim Eurovision Songkontescht,
Wie mir schwizer zum Schluss juble und gha händ e riise Fescht. 
Jo glar, anderi hänn us em Fescht gmacht e Demo,
Nur will e Person gwunne het wie Nemo.
Goots eigentligg no guet? Händer eigentligg no alli Tasse im Schrangg
Miir loose nit, miir sage super Nemo toll gmacht, härzligg Dangg.
So ruggt jetzt Basel ins Schiinwärferliecht und wird funggle
Und s Grossbasel, liecht griegt in die Gasse, die dunggle.
Denn do sich jo nüt me loos zobe in de Gasse,
Dorum mien mir Combonischte amme go stimmig mache,
Also kömmet zeige mirs däne! HOCH DIE TASSE !!!

Nei, ich find es muess wider mehr ufbliehe das alte Basel, im ärnscht,
So wie ano dozmol bim Hotel Basel und so, färscht.
Doch jetzt kömme die drey scheenschte Dääg und d Stadt wird wider voll,
Yych freu mi änderlich wider Fasnacht juhhhuuiiiii so toll.

Drumm loos, gang schnäll heim und zie di Goschdyym und d’ Larva aa
Nimm di Frau, di Kind oder dr Maa,
Und loos bedächtig in die morgendligi Stimmig,
Jedes Gsicht, jetzt luegt friidlig und nimmi grimmig.
Bisch parat? Blad schloots 4ri, hesch ghört du Dotsch!
Denn heissts, es isch Fasnacht “Syg wie de wotsch”!